عبدالغفور البورعى

عبدالغفور V.S متولي

2 من اهم نماذج رجال الاعمال اللي اتقدمت، الرابط الوحيد بينهم انهم

 مكانوش حرامية بس الاختلافات بينهم كانت شاسعة كالأتي :

-عبدالغفور مكافح وعصامي، متولي مجرد وصولي فهلوي

-عبدالغفور مؤمن بالتخصص فى شغله فى الورشة فهيم افندي وفى

 المصنع المهندس وكان مستمع جيد لاهل الخبرة، اما متولي فكان

 ممشيها بالحب ومعتمد على تطبيل عم حسين، لذلك عبدالغفور عمره

 ما اتضحك عليه لكن متولي اتضحك عليه كتير

-عبدالغفور كان ممتن ومعترف بأفضال الناس عليه زى الشيخ حنفي

 والمعلم سردينة، متولي كان ناكر لاغلب الجمايل والأفضال وشايف 

ان ثروته دي كلها من تعبه فقط مش من ثروات زوجاته

-عبدالغفور طموح لكنه قنوع وراضي، متولي مكنش طموح قد ما كان

 طماع فى كل حاجة الفلوس، الستات حتى الزمن كان عايز يخلى كل

 الازمنة زمنه

-رغم انه ظاهريا يبدو لك ان عبدالغفور رجعي ومتولي متفتح ومودرن

 الا ان الحقيقة هى العكس، عبدالغفور ساب ولاده يكملوا تعليمهم

 ومتدخلش فى جوازهم او اختياراتهم او حياتهم عموما، فى المقابل

 متولي رفض يخلي ابنه يكمل تعليمه وجوزه بنت مراته عشان ثروتها

-رغم انه ظاهريا برضو ممكن تشوف عبدالغفور راجل قفل ومتولي

رومانسي، الا ان برضو العكس هو الصحيح، عبدالغفور كان مهووس 

بالبت فاطنة فى المقابل متولى محبش ولا واحدة من اللي اتجوزهم

 كلهم كانوا مصلحة مش اكتر ومتولي عموما محبش حد غير نفسه

-عبدالغفور ساب ابنه يعيش فى جلبابه باختياره، متولي عّيش ابنه فى

 جلبابه بالعافية، لذلك ابن عبدالغفور قدر فى النهاية يكون شخصية 

مستقلة لنفسه، لكن ابن متولي كان مجرد ظل لابوه

-اغلب رجال الاعمال بيصدروا نفسهم على انهم عبدالغفور لكن فى

 الواقع بيكونوا متولي وبشكل ألعن بكتير كمان

الله يرحمك يا نور يا عظيم